Trivselskveld med både korsong og allsong

Prosjekt 17-koret stod som arrangør for «Syng med oss»-kvelden på Gammelfabrikken onsdag kveld.  Egentleg vart det reine kulturkvelden, med omvising i den historiske avdelinga som held hus for både Trollheimsutstillinga, verktøyutstillinga etter Sigvart Husby, Henrik Halle og Olav Stengel – samt utstilling av historiske modellar frå Talgø sin møbelproduksjon. Gunnar Nordvik og John Moe sørga for omvising medan publikum venta på at songkvelden starta.

Dirigent for Prosjekt 17-koret, Bernt Bøe, hadde samla troppane i konferansesalen, saman med publikum. Prosjekt 17-koret vart slege saman av Todalskoret og Åsskard kyrkjekor som «fekk med seg» Bernt Bøe som dirigent, da han gjekk over i pensjonistanes rekkjer for nokre år sia. 

Borghild Talgø ønska publikum velkomne til songkveld, der det var høve til å kome med melodiønskjer for allsongen i tillegg til at koret hadde eit eige program som dei gjennomførte.  Blandinga av korsong og allsong vart ei triveleg stund, og  publikum såg ut til å stortrivast med å synge kjente og kjære songar som den reinaste ønskjekonserten.  Ekstra fint vart det når ein kan kombinere korsong og allsong med tradisjonell song som skaper slik god trivsel.

24 forskjellige nummer var det plass til på køyreplana,  men midt i programmet var det lagt opp til pause med kaffe- og loddsal, før ein fortsette og kunne avslutta med kveldens einaste kyrkjesong – «Hosianna, jord og himmel.  Dirigenten rosa publikum for flott og kraftig allsong og takka samtidig kordeltakarane for det gode miljøet i koret – vi er nærast ein stor familie når vi kjem i hop og eg føler meg privilegert som kan oppleve slik samhald. 
Vi for vår del takkar for ein fin og triveleg songkveld  – slik gir meirsmak!