Fredag 20. mars klokka 19:00 og laurdag 21. mars klokka 19:00 inviterer Surnadal Hornmusikk til storbandkonsert med solistar, band og profesjonelle dansarar i Storstuå på Surnadal kulturhus. Surnadal Hornmusikk har i dag knapt tretti aktive medlemmar og har øvingane sine i sitt eige hus, Tonheim på Setergarden. Einar Sødergren er dirigent for hornmusikken.
På eit pressetreff torsdag presenterte leiar Ragna Marie Mauset, nestleiar Baard Løfaldli, dirigent Einar Sødergren og bandleiar Rune Dalager opplegget for storbandkonserten, samtidig som dei kunne fortelje at billettane til storbandkonserten no er lagt ut for sal på kulturhuset sine heimesider.
Samspelt band
Bandet som skal bidra under Storbandkonserten består av Rune Dalager på gitar, Torbjørn Kvande på bass, Gard R. Nødset på slagverk og Rolf Paulsen på tangentar, alle fire velkjente namn i musikklivet i Surnadal.
Dirigent Einar Sødergren og Surnadal Hornmusikk er allereie godt igang med øvingane. Foto: B G Ansnes
Dyktige lokale solistar
Solistane er også godt kjente namn i det lokale musikklivet og består av Silje Beate G. Holten, Ingrid Ranes, Håkon Solem, Halvor Drøpping, Øystein H. Bondhus og Toril Moe.
Bilde: Komite – F.v. bandleiar Rune Dalager, dirigent Einar Sødergren, leiar i hornmusikken Ragna Marie Mauset og nestleiar i hornmusikken Baard Løfaldli
Tema for «Storbandaften»
Dei fire fortalte at temaet for «Storbandaftenen» sjølvsagt er storband, og at vi i alle fall får høyre låtar skrivne av mellom anna Michael Bublé, Frank Sinatra og Ella Fitzgeral.
Lovar kvalitet i alle ledd!
Bandleiar Rune Dalager lovar at «Storbandaftenen» vil bli ein konsert med kvalitet i alle ledd, frå hornmusikk via band til lokale solistar. Publikum vil få musikalske opplevingar på høgt nivå, la Baard Løfaldli til.
Håper å fylle Storstuå båe dagane
Billettane til «Storbandaften» vart lagt ut for sal på kulturhuset sine heimesider torsdag, og dei fire håper sjølvsagt at dei klarer å fylle Storstuå dei to dagane i mars. Det er mange timar med felles øvingar og samspel som ligg bak ei slik oppsetting, fortel dei fire, før dei finn plassane sine og tek til å øve saman med resten av hornmusikken.
Da er det berre å begynne å gle seg til mars og “Storbandaften” i Storstuå på Surnadal kulturhus! Kjøp billettar til «Storbandaften»