Fotturistane strøymer til turisthyttene i Trollheimen – det meldes faktisk om auke i belegget på 30%, og det er nok tal som kan brukast her og det, seier Gudmund Kårvatn. – I går kveld var det fylt opp til siste plass, og slik har det vore fleire dagar no i sommar.
Sjølvsagt er vi spente på kva sommaren har å by på, men det ser no ut til å bli stabilt og bra vêr i komande veke iallfall, og da er vi komne langt ut i juli. Til Kårvatn kjem det fotturistar både frå Trollheimshytta, Storlidalen og frå Innerdalen, og det har det gjort heilt sia 1890.
No tek neste generasjon over turisttrafikken på Kårvatn – frå venstre Oda, Nora og Erik. Foto Jon Olav Ørsal
Gudmund fortel at det no er neste generasjon som vil få ansvaret for å drifte turistkvarteret på Kårvatn. Det er Oda, Erik og Nora som i sommar har ansvaret for å ta i mot turistane og ha tilsyn med sjølvbetjeningskvarteret i Målastua, medan Berit og Gudmund har drive mellom 40 og 50 år tilsaman.
Gudmund fortel at han no ser at det aukar på med familieturar til Kårvatn – familiane reiser saman og ligg 1, 2 eller 3 netter på Kårvatn, og går turar i nærområdet og kosar seg med litt fotball og andre aktivitetar.
På familietur til Kårvatn. Familien Krogstad har vore på fjelltur i dag, no brukar Jens og Ola opp resten av energien medan far er på tur til Storfjellet og mor Hedda er heiagjeng. Foto Jon Olav Ørsal
I dag var familien Krogstad frå Molde på besøk, og har i dag gått rundt 10 km, med tur til Nauståfossen og til Naustådalssetra. – Vi tok oss fri ein dag medan vi ventar på ferien som startar om eit par veker, seier mor sjølv Hedda Nordby Krogstad, medan gutane Jens og Ola dyrkar fotballen og far sjølv tek ein tur til Storfjellet.