Fleire husstandar utan vatn i Surnadal kommune

Fleire husstandar i Surnadal kommune er utan vatn som følge av at vatnet har frose eller er borte som eit direkte resultat at den tørre etterjulsvinteren. Surnadal kommune har med bakgrunn i dette, og at Teknisk drift opplever at stadig fleire tek kontakt for å få hjelp fordi vatnet er borte, torsdag hatt eit beredskapsmøte for å diskutere situasjonen.

Teknisk drift arbeider fortløpande med å følge opp meldingar, gje råd og bistå der kommunen har ansvaret. Mange av dei innrapporterte problema ligg likevel på eigedomar der huseigar sjølv har ansvar for røyrinstallasjonar og frostsikring.

Slik kan ein førebygge at vatnet frys

Kommunen oppmodar alle innbyggarar om å sjekke og sikre eigne røyr så langt det er mogleg. Her er nokre råd:

1. Hald jamn varme i rom med røyr

Sørg for at kjellarrom, tekniske rom, krypkjellarar og andre utsette område ikkje blir for kalde. Temperaturen må ikkje vere under 10 grader+
Unngå å skru heilt av varmen når du er borte.

2. Opne skapdører

Dersom røyr går langs yttervegg eller inne i kjøkken- og baderomsskap, kan du opne dørene slik at varmen frå rommet kjem til.

4. Sikre og isoler utsette røyr

Bruk isolasjon rundt røyr i kalde rom, krypkjellarar og garasjar.
Sjekk at ventilar i kjellarar og boder ikkje står heilt opne i ekstremkulde.

5. Steng og tøm utekranar

Utekranar som ikkje er frostsikre bør stengast og tømmast for vatn om vinteren.

6. Har vatnet allereie frose?

Prøv å tine røyr forsiktig med varmluft (til dømes hårfønar).
Ikkje bruk open flamme.
Dersom du ikkje kjem til eller er usikker på ansvaret, ta kontakt med røyrleggar.

Om vatnet likevel skulle fryse, er det lurt å ha kanner med vatn ståande klare på førehand. Kommunen er behjelpeleg med kanner. Det vil alltid ta noko tid å få utbetra situasjonen, seier Geir Skoglund, driftsleiar vatn og avløp i Surnadal kommune. Han legg til at røyrleggarane i Surnadal har meir enn nok å gjere for å bistå privatpersonar.

Ordførar Hugo Pedersen oppfordrar pårørande og naboar om å bistå med å fylle vannkanner hos eldre og sårbare.

– Ver ein beredskapsvenn, seier Pedersen.

– Vi ser at kuldeperioden kan strekke seg eit par veker til framover. – Vi kan ikkje utelukke at vi må be innbyggarane om å rasjonere på vassforbruket og førebu seg på å kunne ta i mot vatn, seier Skoglund og Pedersen, og refererer til vasskrisa som oppstod i 2013 grunna frost, men håpar situasjonen ikkje blir så ille som da.

– Vi håpar innbyggarane viser tålmod og forståing i situasjonen med ein litt uvanleg vinter, seier påtroppande plan- og beredskapssjef, Gunhild Eidsli.

Kommunen ber alle som opplever bortfall av vatn om først å undersøke om det kan vere interne røyr som har frose. Dersom ein mistenker at feilen ligg på kommunal leidning, ta kontakt med:

I ordinær opningstid (klokka 09:00 – 15:00) ring Servicetorget på telefon 71 65 58 00.
Utanom ordinær opningstid (klokka 15:00 – 09:00) ring teknisk drift sin vakttelefon 416 35 388.

Kommunen vil også halde fram med å informere dersom situasjonen endrar seg eller det kjem behov for nye tiltak.